《鬼魅山房》之原謎：Centralia 嘅悲劇

未開始講今次嘅話題之前，我先要承認對於「鬼故」係冇興趣，或者可以話一聽到就走唔切，更加唔好講連恐怖片都唔敢睇，驚住個心臟受唔住咁大反應而導致心臟出問題而離世；但係對於呢啲咁恐怖嘅故事背後嘅寫實就好有興趣，因為啲傳說嘅背後就是有一個驚心動魄嘅故事，而導致呢啲地方變成鬼城有好多原因，包括天災、人禍、戰爭、核意外不等，而今次我想講嘅話題就來原自早兩年喺YouTube嘅一個記錄短片頻道《Bright Sun Films》同埋長啲嘅記錄片頻道《Part-Time Explorer》各做一集，佢哋都提及到究竟佢哋點樣將一個冇乜特別嘅小鎮變咗一個淨係得番五個人住嘅廢鎮，呢個小鎮就喺位於美國賓夕凡尼亞州哥倫比亞縣（Columbia County）嘅自治市森特勒利亞（Centralia)。

同美國好多大小城市及小鎮一樣，呢啲地方喺18世紀之前都係屬於美洲原住民部落所擁有，直至歐洲人殖民到美洲之後，呢啲土地就被瓜分成為大小城鎮，Centralia亦都唔例外，不過就冇好似同班原住民打仗，反而就喺1749年以當時嘅五百英鎊出售俾啲殖民代理，而且呢次交易仲包括埋整個哥倫比亞縣咁大嘅土地。 其中一個喺美國獨立戰爭嘅英雄Robert Morris就喺1793年投資咗森特勒利亞，但由於佢喺同期參與其他投機活動而導致破產清盤，呢塊土地就俾美國第一銀行充公咗，並且冇幾耐轉售俾另一個同美英戰爭有關嘅人物，佢就係法籍海軍隊長Steven Girard。 Girard就以三萬美元收購咗Morris嘅土地，其後佢得知呢塊地皮下面有種叫做無煙煤（anthracite）嘅存在，但係到佢臨死之前都冇機會發掘出嚟，直至佢離世後嘅三十年幾後俾一間叫做Locust Mountain Coal and Iron Company喺1842年買咗呢塊地，十四年後Locust Run Mine同埋Coal Ridge Mine開始運作，跟住落嚟嘅七年時間，Hazeldell Colliery Mine（1860年）、Centralia Mine（1862年）、Continental Mine（1863年）亦都相繼運作，令到賓夕法尼亞州東部成為煤礦銷售集中地。

根據當時嘅人口普查，森特勒利亞喺1890年達到該鎮嘅最高人口統計為2761人，當陣時有五間酒店、七間教會、廿七間酒巴、十四間士多及街市、兩間劇場、郵局及銀行亦各有一間，同時期黑煤（無煙煤嘅別稱）嘅生產亦都達到高峰，不過正因為呢種瘋狂生產導致生產總值下跌，而人口亦因為美國參加一次世界大戰、1929年華爾街大股災、同埋二次世界大戰而大跌，導致Lehigh Valley Coal Company關閉其中五個煤礦；與此同時，有班業餘煤礦工人以「掠奪柱子」形式繼續進行非法採礦，導致好多空礦倒塌，亦因為咁而種下其後無可輓回嘅災難。 1949年賓夕凡利亞州議會通過一條提案，將所有Centralia嘅黑煤權利轉交俾當地嘅市議會，而當地議會喺1950年就取得黑煤嘅發掘獾，當年嘅聯邦人口普查記錄到得番1986人住喺嗰度。 雖然合法採礦到咗1960年代結束咗，非法採礦要等到1982年先至完結，之後就淨番地面式採礦繼續活躍，而當地嘅鐵路亦都喺1966年停止咗有一世紀嘅運作。

自二次世界大戰後，森鎮就有人發現咗八個非法堆填區，而八堆嘅出現就係新賓州新法例關閉咗St. Ignatius Cemetery以西嘅堆填區嘅反應，但其實早於1935年已經出現咗至少八個非法堆填區，到咗1960年代。 州政府已經諗住要管理啲堆田區，點知喺1962年五月27日，縣政府派出一組五人自願消防員去到嗰啲廢棄咗煤礦，佢哋發現堆田區啲火頭仲喺度燒，於是區政局想起黏土牆作為防火，但係就半途而廢，導致地底嘅煤煙出咗嚟兼目產生地底火。 不過真係逼到成個村嘅人即時疏散嘅發現就喺1979年嘅某一日，擁有一間石油站嘅前市長John Coddington用一支尺子去驗吓嘅電油嘅溫度，正當佢抽走支尺子就覺得異常咁熱，於是就攞支計溫器針，一掂都嚇死佢，因為油箱入面電油嘅溫度等同去餐廳吃牛扒熟咗嘅溫度差唔多：華氏172度（或攝氏77.8度），咁嗰間電油站就永久關閉，而且仲要盡快抽走晒箱內啲油，避免遇上更嚴重嘅災難，例如電油站大爆炸。

呢次事件只係一個前奏咋，兩年之後，1981年情人節（2月14日）一個12歲住喺當地嘅居民Todd Domboski突然間喺佢屋企後花園內跌咗落去一個四尺（1.2米）闊150尺（46米）深嘅沉洞，Todd嘅14歲表哥Eric Wolfgang拉佢返上嚟救咗佢，隨即對驗沉洞出咗嚟嘅蒸氣中發現到致命性嘅一氧化碳，呢段新聞一出嚟雖然隨即通晒天，但社區內反而就持有兩極看法。 不過事實上此地不可久留，美國國會撥咗四千二百萬美元作為搬遷工作嘅款項，絕大部份接受政府嘅買斷報價，喺呢段期間超過一千人搬走咗，去到1990年嘅人口普查結果，Centralia得番63個居民，儘管當地居民試圖阻止土地徵收但係都阻止唔到，之後政府各部門同埋郵局都開始刪除該地嘅存在，包括2002年美國郵政服務停咗當地嘅郵區號碼，到咗2020年就得番5個人仲住喺度，依家更可能仲少；鄰近嘅Byrnesville亦都被殃及埋，其他受到破壞更包括賓夕凡尼亞州嘅61號公路，連該地嘅時間囊都要掘返出嚟搵地方再埋過，該地嘅民政廳到殘舊不陷。

對我嚟講，Centralia嘅悲劇就係因為煤礦公司對啲礦場唔做好事後清潔工作，俾咗一啲冇牌營業兼為掘而掘，再俾一啲唔識環境嘅人放啲燃燒品，冇諗過整個地區比想像中更加多通道之外，仲係通條易燃物品，唔累咗成個社區就假啦！聽聞仲話可能幾百年後都唔知燒唔燒得完喎，連埋土庫曼嘅另一個深洞有得比，只不過唔同嘅就係嗰度係冇人住，相反，Centralia曾經係係一個煤礦小鎮，曾幾何時有埋自己嘅歷史。 不過近年嚟有好多另類傳奇誔生咗，理因就正因為有好多作家、遊戲機製造商、同埋冒險者對呢個地方大有興趣，於是就以呢個被荒廢嘅小鎮作為恐怖類作為參考，製作咗各種唔同類型嘅作品去吸引鍾意呢種系列嘅羣眾，但至於呢個地方之後嘅發展就可能繼續擴散，又或者有人終於發明一件物質可以滅咗呢場悲劇之外，可能再冇其他方法可以解決啦。