從《街頭霸王》電影「系列」睇泰國近代歷史

好多電影迷甚少會接觸到不同政治光譜，有啲就話：「我討厭政治，唔好同我講政治！」 另外一邊就煩麻煩唔想「歸邊」，因為搞「歸邊」其實喺度搞分化。 說實話，我本來想冇諗過講政治，香港直頭冇乜點講，直至「六四」發生咗、嚟到三藩市之後就經常都聽到一啲政客同埋政策，我就唔嗲唔吊咁就留意政治嘅演變，不經不覺就已經三十幾年。 返回正題，今次呢個標題可以算係其中一個比較難嘅題材，由於我到依家都冇裝架遊戲機，所以我對遊戲機文化係非常之陌生，除非嗰啲遊戲改編成為動畫版或者電影啦，但係喺嗰陣時呢種片種因為電影科技未發達，所以嗰陣時拍出嚟嘅效果同2019年嘅POKÉMON Detective Pikachu《POKÉMON 神探Pikachu》(名探偵ピカチュウ)相比簡直係差好遠。 而今次要講嘅就既有政治更有一個遊戲機遊戲系列，但更重要嘅就係點解呢兩樣嘢合埋一齊時反而變咗水火不容嘅狀況呢？ 呢個就係我想認真咁探討一下，但係未開始之前，請先睇以下嘅片段（不過就唔好期望有任何字幕，因為佢一早講過唔會搞字幕，怕有啲香港泛藍嘅支持者會對本人嘅生命作出傷害。）

要講起亞洲東南亞地區歷史點樣影響到《街頭霸王》真人電影版，深水清嘅人實會提及當地不知所謂嘅政治架構，同埋因為長期以嚟嘅治安問題而點樣影響當地居民嘅生活，點解？ 因為呢個地區同以北嘅日本同韓國嚟對比，冇一個國家每隔幾年唔會係唔係就搞軍事政變，隨時隨地會彈出一個言行舉止都好似毛澤東或者更衰啲嘅土豪搞到滿成風雨，最後搞完另一次政變，跟住又係好似之前咁樣，始終冇辦法逃脫呢個惡性循環。 以柬埔寨為例，貴族搞共產主義惹嚟波爾布特領導嘅赤柬政權，佢做咗三年國家總理，好搞唔搞就學埋毛澤東嗰啲垃圾政策，學人搞乜嘢文化大革命，點知就變成「紅色高棉大屠殺」，八百萬人口殺咗者大概有150萬人到300萬人，最後要越共派兵擺平咗赤柬同埋逼走波爾布特，但係已經做成永久性嘅損害；輪到緬旬，呢個國家喺好多人眼中簡直係點培養民主意識，最終俾班又文盲又封閉嘅軍閥玩死，因為自英屬仰光時期以嚟，仰光以外嘅郊野地方冇乜人識字，就算點樣搞基建都冇用，呢班軍閥淨係槍釺子成為掌權嘅實據，所以咪係昂山素姬被軟禁時期時位嘅總理定係乜𨶙就以「家庭主婦」嚟形容昂山囉； 一講到泰國，除咗好多佛廟、泰式咖哩以外，就係一而再再而三嘅軍事政變，自從二次世界大戰之後，泰國嘅政局一直都唔係咁穩定，尤其係自1950年代以嚟，每隔幾年就爆發一次，淨係最近嘅兩次為例泰國軍方以貪污為理由通緝逃離泰國嘅他信同埋佢細妹英祿·西那瓦（Thaksin and Yingluck Shinawatra）加埋尼瓦探隆·汶頌派訕（Niwatthamrong Boonsongpaisan），而代替西那瓦政權嘅就係巴育·占奧差（Prayut Chan-ocha）兼任總理及國防部長，唔使估又係一個軍人啦，泰國同緬甸都好類似，有啲唔對路就唔肯「願賭服輸」，又係一個養唔熟嘅政治架構，更加唔好講泰、緬、寮（老撾）三國之間有個出名有好多毒梟嘅地界叫做「金三角」，呢個地方簡直係兵賊不分冇皇管，甚至乎其中一個毒梟家族仲係管理緬甸最大機場，唔荒誕無論就奇怪。

咁對《街》嘅關連喺乜嘢呢？ 你估下呢兩套電影進行拍攝嘅時間係咪有啲好似黑社會洗完黑錢後買咗名貴嘅汽車呢？ 冇錯，呢兩套之所以可以拍到片就係泰國軍政府為咗政變時做成嘅傷害嚟「洗底」，尤其係每次政變之後都係跟咗呢條方程式嚟掩飾嗰啲暴行，再離譜嘅係仲要攞埋「維護泰國皇朝」做擋箭牌，唔怪得《街》片拍攝經常有啲奇怪嘢故事爆咗出嚟。 如果你同我講泰國好歡迎外國片商拍片㗎，咁唔該你對呢幾個問題俾個答案：

1. 點解Vega（日版）［M. Bison（歐美版）[Dictator] 貝卡（赤目司令）］喺第二套電影《春麗傳奇》唔穿上經典嘅紅將軍軍服呢？
2. 點解絕大部份嘅電影唔似係喺泰國境內拍呢？
3. 點解赤軍軍團冇喺《春》片出現過嘅？

其實答案就好簡單：自1932年成為君主立憲制國家以來更迭頻密，而《街》同《春》兩套片都喺政變之後發行，如果你係認為呢啲都係巧合嘅話，咁我就係話俾你哋聽呢個絕對唔係巧合，呢啲係為咗洗底而去做嘅政治手段。 如果唔係巧合嘅話，咁係乜嘢嚟呢？ 咁我就話俾你知個背景呢。 自1932年以嚟泰國發生過23次大大小小嘅政變，而最近嘅軍事政變根源就要由1957年嘅政治政變講起，但要明白泰國當時嘅情況係點，唔拉長講歷史係唔會明白之後嘅發展，更加唔會明白我嘅理據邏緝，但係要提及呢一切歷史必須由二次世界大戰太平洋戰爭過後開始。 自1938年通稱鑾披汶（Phibun）嘅鑾披汶·頌堪（Plaek Phibunsongkhram）泰國總理兼任國防部長、內務部長和陸軍總司令等職，集軍政大權於一身，由於佢喺戰時係屬於親日派，佢唔單止奉行泛泰主義方針，仲代表該國加入德、意、日嘅軸心國，對外挑起邊境糾紛，對內煽動泰人與華人嘅民族隔閡，雖然佢仲未簽過軸心盟約，亦因為佢俾日軍穿越該國侵入英屬馬來亞同埋英屬緬旬而成為日本帝國唯一一個盟友。 不過多年嚟嘅親日主張遲早會惹起一啲人嘅反感，其中以時任泰國駐美大使拉查翁親王社尼·巴莫（Seni Pramot）領導嘅自由泰(人)運動（Seri Thai）成為焦點，社尼喺美英向日本宣戰不久，泰國試圖叫佢遞交泰國向美國宣戰書信俾美國政府，社尼唔肯交遞，反而同好多駐外大使同留學參加組織，冇幾耐連時任泰國駐英使館素巴沙瓦·沙瓦狄瓦親王（Suphasawatwongsanit Sawatdiwat）領導嘅官員同留英嘅學生亦都組織佢哋嘅同名運動，最後連國內嘅同胞亦都咁做，導致1944年發動嘅軍事政變，事件嘅導火線就係佢諗住將該國嘅首都由曼谷搬到近住佛廟陣地，而且仲喺正經濟負擔俾戰爭嘅持續而上升，鑾披汶被逼辭去總理職務，雖然佢喺戰後以戰犯罪名被捕入獄，由於佢反共嘅立場，加上美國支持，次年獲釋。 1947年11月10日受到頌堪嘅幕後領導之下發動另一次政變，推翻自由泰人運動同埋泰國民主黨政府，佢本人再次成為泰國首相。 頌堪嘅領導維持咗八年，直至1957年，時任國防部長沙立·他那叻（Sarit Thanarat）發動軍事政變，Phibun被逼逃亡海外，最終喺日本神奈川縣離世，享年66歲。

沙立嘅統治維持咗唔夠六年就喺1963年12月8日因肝臟衰竭突然去世，佢嘅副手他儂·吉滴卡宗陸軍元帥（Thanom Kittikachorn）承繼首相嘅職務，兼且延續反共產主義嘅政策，好嘅消息就係放寛言論管制，重新開啟大學批評時政的風氣，大學生亦自此時由一萬五千人成長到十五萬人，但過往嘅抑壓遲早就好容易爆發一次人民政變。 1973年10月6日至15日，數以萬計計嘅學生、異見人士等人屢次出街示威遊行抗議，泰國軍政府就屢次展開武力鎮壓，逮捕數以千計嘅示威者並且控告佢哋顛介覆政府罪名，造成近千人死亡，逼到泰國皇室成員都要介入，最終他儂、佢嘅內相巴博（Praphas Charusathien）、以及納隆上校（Colonel Narong Kittikachorn，其妻為巴博之女）夫婦流亡國外，事件先至迅速平息；但三年嘅民主過程中卻種下咗另一個禍根而導致泰國右翼主義再次返嚟，兼且亦都俾咗軍方一個藉口推翻文人政府，而是否要求美軍撤出泰國成為導火線，尤其係事關於美軍真接或簡接俾咗好多就業機會，喺經濟角度而言撤走美軍等同於失業，而且喺呢個時候鄰國越南、緬甸、老撾、同柬埔寨都相斷實行蘇共或者中共制度，唔激起當地嘅反共勢力都唔得，最終因為他儂以僧人身份回國而引起1976年10月5至6日嘅法政大學大屠殺，儘管右異份子成功推翻文人政府，他儂自己就反而冇份返回政壇，根據官方統計，大屠殺一共導致46人死亡，167人受傷，3059人被捕，真實數字至今仍然無法確實，皆因所有事件嘅檔案仲未全部公開過。 泰國再次落入軍政府手上兼實行戒嚴令，而其後嘅左翼運動亦都被瓦解，好多學生組織被解散又或者逃離到叢林並加入武裝泰國共產黨組織，社尼因而被逼下台，泰國國會亦都被解散，媒體審查制度同埋政黨活動亦都被禁止晒。 事件之後，喺1976年10月8日當時嘅國防部長沙鄂·差羅如（Sangad Chaloryu）就推舉他寧·蓋威遷（Thanin Kraiwichian）為總理，他寧政權延續沙鄂政策，繼續打壓左翼陣營包括沒收及燒毀親共書籍，不過他寧嘅權力受到青年軍以及沙鄂嘅挑戰，後者最終逼走他寧嘅泰國首相，取而代之嘅就係江薩·差瑪南（Kriangsak Chamanan）。 江薩嘅成就就喺1979年去咗中國同鄧小平會談，為咗結束中國對泰國北部共產黨游擊隊勢力嘅支持，並且允許中國通過泰國向正在遭到越南攻擊嘅紅色高棉政權嘅波爾布特提供支援。 呢個時候外界先至對泰國是否真係追求民主化已經露晒底，泰國人民根本上已經習慣咗穩定根本就當乜嘢叫做「民主」不切實際，並且只會製造不必要嘅麻煩，亦因為噉可以解釋到點解啲軍事政變會搞得咁成功啦。

到咗1980年代，時任內政部副部長和國防部長嘅炳·廷素拉暖（Prem Tinnasulanon）將軍接任成為泰國第16任總理，雖然亦都爆發過兩次政變，但係目標就落咗喺一班青年軍身上，只不過由於佢哋唔夠經驗而導致敗陣；值得一提嘅就係1985年嚟失敗政變中，發動嘅人就係一名泰國喺1983年喺國內搞金字塔式騙局而要「着草」到英國嘅泰國商人叫做Akeyuth Anchanbutr，呢條友其後亦都搞過西那瓦兩兄妹，直至喺2013年6月6日報稱失蹤，5日後佢嘅屍體被發現；相反，廷素拉暖嘅領導唔單止結束咗泰共嘅威脅，並且成功帶領該國嘅高迅經濟發展，炳因佢嘅良好表現而成為已故拉瑪九世嘅親信。 1988年國會改選後拒絕連任，而接任炳嘅就係泰國民族黨領袖差猜·春哈旺（Chatchai Chunhawan），佢嘅政權包受集體貪污之嫌，連1989年颱風蓋伊嘅處理方式直頭係辦事不力，猛咁低估咗颱風嘅損害，連善後都柒到無良，政府運作甚至乎係「任攞唔嬲」，最終喺1991年軍事政變中被推翻，阿南·班雅拉春接任總理嘅職位；雖然短短一年，但係佢嘅政續有目共睹，而且仲帶嚟難得嘅民主政制嘅機會。 跟著嗰十年就成為三個人嘅天下：泰國民主黨嘅川·立派（Chuan Likphai）、泰國國民黨嘅班漢·西巴阿差（Banhan Sinlapa-acha）、同埋泰國新希望黨嘅差瓦立·永猜裕（Chawalit Yongchaiyut），不過後兩者就因為遇上亞洲金融風暴而迅速下台，主派反而推出以促進民主、縮小貧富差距、推動地方分權及AFTA（東盟自由貿易區）做為施政方針，若果唔係初任首相時執政聯盟嗌大交，導致政府施政困難，兩年後捲土重來，並且向向國際貨幣基金組織（IMF）申請支援，提出建議減稅、創造就業機會、公共投資、支援中小企業等經濟對策，並推動處置不良貸款嘅政策，但最終喺2001年嘅國會大選輸咗俾他信，至於由他信、英祿、尼瓦探隆、巴育以後嘅政局不穩就更加突出咗泰國政局嘅終極矛盾，為咗追求穩定同民主，究竟可以做得特別血腥，甚至可以連百姓嘅生命都處於水深火熱狀態之中，正如黃世澤喺嗰個片段中所講嘅樣：整個東南亞對於咩嘢叫做「管理」係乜叉都唔識，唔怪得外國喺泰國嘅影片唔係要改晒原著中嘅樣貌，唔係就唯有另覓地方拍攝啦，因為泰國太過習慣極權統治，所以喺《街》片中啲軍方永遠都只能好正氣，奸角就只可以穿上西裝外套，難怪赤目司令喺《春》片中穿上好似他信咁嘅服裝啦，喺泰國人民嘅眼中邊個有財有勢都會成為要賣，所以除非當地可以喺兩者取得平衡，否則嗰度就永遠成為冇皇管。