由《勝者為王》系列到WSOP嘅差距

我唔係對賭有乜嘢興趣，老實講，雖然話曾幾何時我有去過兩三間賭場酒店啫，叫我去親身去參與其中就咪搞我，尤其係我試過一次喺拉斯維加斯嘅凱撒皇宮酒店睇完演唱會嘅翌日想去玩幾手，點知我反而要留喺酒店房度休息一日，因為神送件肚瀉俾我防止去睹，不過咁樣都好呀，一嚟神提醒我當日我要Vegas嘅目的係做咩嘢，二嚟我唔會對錢會有咁多幻想同埋貪念而死都唔返屋企唔返工，三嚟事實上我冇乜賭癮，更加唔好講話我冇乜賭品可言，就算識都寧願做實事好過，而且由2006年到依家遇上好多唔開心嘅事，尤其係試圖去貪過啲唔存在嘅錢財，最終咪差啲連命都斷送埋，但因而咁而信咗主囉。 呢個儘管唔係個主題，但係都算係離唔開個「賭博」兩個字，適逢每年一度嘅世界撲克大賽（World Series of Poker）啱啱喺早幾日結束咗近一個幾月嘅比賽，如果我話你知呢個比賽同我曾幾何時喺電視機上睇過嘅以「賭博」為題材嘅劇集係幾難以睇齊，尤其係對一啲睇慣嗰啲作品到咗抽唔出故事內容嘅觀眾，真係連咩嘢叫做「實質作賽」係老作㗎。 雖然嗰啲作品都可以算係幾刺激，不過有冇諗過作品嘅背後似乎背住咗另一個非常之暴力嘅平衡時空，甚至乎部份內容太過天馬行空不切實際咁嘅。 有見及此，我想趁機會好好咁回顧下曾經轟動香港電視收視率嘅嗰啲製作，嗰啲故事中嘅平衡宇宙觀背後嘅暗意，點解嗰啲製作同現實大賽係點咁切實際，最後我就對兩者之差作出評價。

首先我想講嘅就係關於以賭博為題材嘅港產娛樂製作，究竟幾時開始以賭博作為題材，如果我冇記錯嘅話，應該就大概喺1980年《千王之王》或者《千王群英會》就上咗電視螢光幕。 當陣時正因為麗的電視推出嘅新劇《大地恩情》將TVB嘅《輪流轉》逼到受腰斬之後，被逼要硬推《千》早啲上映去應對前者嘅收視攻勢；但就以為就咁可以追回失地，點知因就麗的嘅母公司無端白事走去加拿大投資連鎖乾衣店徹底失敗，最終喺1981年賣畀澳洲財團，不過連佢哋都做唔成，最終又要賣畀以邱德根為首嘅遠東發展集團，並且改名為「亞洲電視」。 之後嗰幾年亞視就喺邱林兩個大財團 – 邱德根嘅遠東發展，同埋林百欣嘅麗新集團 – 嘅領導之下，推出咗好多新劇去對抗無線，其中就喺1991年至1993年所推出嘅三部曲系列，以及幾年後將曾經為無綫激退麗的嘅電視劇以類似嘅故事再重現眼前，佢哋就係《勝者為王》三部曲，以及《千王之王：重出江湖》，就係呢兩個電視劇系列成為我對呢個題材有啲興趣，因為我自細就有玩撲克牌，但係講真啦，我對咩嘢叫做「賭博」呢個辭語係要等到我嚟咗美國之後喺KTSF26台睇咗《勝2: 天下無敵》，再加埋表哥教我好幾個遊戲先至知道原來如此；惟獨是喺學校係禁此任何「賭博行為」，所以同好幾個同學都係玩玩吓嘅心態去玩牌，而且全都係喺食午餐時段玩幾手嘅啫。 儘管如此，我當時睇嘅時候，我心就開始諗緊好多對賭場有好多疑問，首先，啲賭術係咪有啲幾天馬行空喎？ 其二，有啲千術喺現實生活中行唔行得通㗎？ 其三，有賭徒就必然有幫派追殺㗎咩？ 其四，逢親兩人賭牌就必然要去賭命咩？ 先記住呢四個問題，因為呢啲疑問就喺我成長過程當中有幸去過幾間賭場時，以及其後喺電視螢幕上逐個解答。

如果講到親身去賭場嘅話，由於我個性嘅問題，我唔係幾鍾意出外旅遊太耐，尤其係賭場酒店，喺我生存於呢個世上，若果我冇記錯嘅話就只係得兩次機會，首次去就喺1997年嘅某個月，我哋一家三口坐旅遊巴士去內華達州里諾市（Reno, Nevada），由於個旅程只係得四粒鐘，所以冇乜時間去參觀其他該市嘅賭場，返到屋企都差唔多近乎半夜。 下一次再有機會就要等到過咗幾年嘅一個偶然啦，時緣就喺2005年嘅九月份我喺KTSF26台收到一個好意外嘅消息，因為我由香港到美國嗰個時期，我係冇去親身去睇演唱會，理由唔係冇錢就係太遠兼冇人陪我去，所以就大至上留喺屋企囉； 不過有咩消息會令我破例呢？ 咁就要認真多謝一個香港歌壇傳奇人物，嗰個咪就係許冠傑。 阿Sam嘅2004年尾復出為當時嘅香港歌壇打咗支強心針，原因係早一兩年嘅香港失去咗好幾名傳奇人物：張國榮（死於2003年4月1日 – 跳樓自殺）、羅文（死於2002年10月18日 – 癌症）、梅艷芳（死於2003年12月30日 – 癌症），正因為咁佢惟有就出山幫手，於是佢就展開咗環球演唱會，其中兩個分站就正正就喺內華達州舉行，分別就係2005年12月3日喺Reno舉行，拉斯維加斯（Las Vegas）就喺兩個禮拜後舉行。 當時我就喺度諗如果我要去嘅話，我想去一個自己未走過嘅地方去睇concert，尤其係如果Reno落大雪嘅話，我分分鐘有排煩有排攪，例不如去Vegas睇嘅話，或者唔會遇上咁凍嘅天氣，於是乎我毫不猶疑就上網到TicketMaster預訂兩張入場券。 不過就另一個問題隨即出嚟，由於我冇乜翻查Vegas嘅地形係點樣，搞到我同父親又嘈生晒； 另一方面我收到兩場ticket，但係完全冇考慮過住喺邊間酒店，好彩媽咪醒目走去附近嘅小型旅遊舍去查詢一下，最終喺臨去前兩個月就訂咗兩張機票同埋酒店住宿。 咁你會問嗰日喺邊度住宿呢？ 現時已經被改建成為LINQ嘅Oriental Palace酒店賭場，而演唱會地點就喺Caesars Palace（凱薩皇宮酒店賭場），正正就喺對面街，所以就非常之方便，一過馬路就係㗎啦（至多咪上埋條行人天橋囉）。

至於我同邊個去呢？ 當然我同媽咪一齊去啦，因為叫阿爸去呢就好枉心機，甚至乎可以話佢冇嗰種閒情雅緻去睇戲，唔好意思講啦，佢嗰種咁燥火嘅性格，隨時仲會當眾出醜。 咁出發係幾時呢？ 居然係演唱會嗰日囉，先由三藩市國際機場出發，大概兩個鐘頭之後就到達依家叫做Harry Reid Las Vegas International Airport，隨後上咗的士去酒店登記房間食晚餐之後再過馬路到Caesars Palace搵場館，原來係近在只尺。 另一樣嘢冇預計過嘅就係我哋嘅坐位喺邊度，當時我知道越貴嘅入場券坐位實會近住個臺上，而最平嘅就會係喺上面，冇諗過個位喺最高嗰層嘅最後嗰排座位（英文做nosebleed section）； 不過點都好，買咗門票當然要去睇啦，而且仲係我從細到大最鍾意嘅歌手之首，對上一次睇到佢開演唱會就已經要講到全家仲喺香港睇TVB嘅時候，所以呢次係我第一次自己出錢兼親身去睇演唱會，簡直係係最enjoyable嘅經歷。 Concert完咗之後嘅嗰個中午就係我第一次真正有機會入賭場睇吓有邊度可以稍為「落吓注」，其中一個地方有留意住嘅就當然係嗰日嘅樸克大賽，但係我個肚就唔知點解會好想去廁所大便，因為咁呢就縮短咗喺賭場遊覧嘅行程，仲要留喺賓房坐喺張床休息下，如果冇估錯係神畀我一個警告信號唔好參興咁樣嘅賽事，不過神寧願我睇吓電視播放同種類嘅比賽好過我參與並唔想返屋企，除非係下載電腦軟件喺電腦或半版電腦度玩一陣間，但係想「贊助」我去參加賭場比賽就簡直唔使諗，就喺嗰陣時先至知道原來我之前睇嘅「賭博」同現實相差好遠囉。

之前我咪提及過嗰四條問題嘅？咁依家我就逐個同你解答啦。 至所以啲賭術係咁天馬行空，咁就要拜一個所賜，呢個人就係江道海。 咁你實會問邊個係江道海，佢嘅家庭背景同埋佢喺娛樂圈嘅歷史係乜嘢嚟㗎？ 呢位金馬獎得獎者喺娛樂圈都幾出名，佢家姐係前麗的電視女演員江玉珠，姐夫就係馬來西亞籍華僑商人莊寶，佢嘅外甥女（亦係莊寶嘅女）就係藝人莊氏三姐妹（莊思敏、莊思明、莊思華）；至於佢嘅職業背景，如果冇記錯嘅話，曾幾何時有一間專門玩魔術嘅舖頭叫做「朱氏魔術」，而江道海就係專玩雜技魔術同埋精通啤牌，如果有睇過《賭神》、《賭聖》嘅話，佢就係做呢兩套電影嘅賭術指導，唔單止噉，佢亦都有份設計《勝者為王》三部曲嘅指導。 當我第一次睇《勝II:天下無敵》嘅時候，正當我仲就讀緊離屋企冇幾遠嘅Lincoln 高中，雖然我對咩嘢叫做「賭術」係一無所知，但係我已經對玩啤牌有興趣，只不過我點打都輸畀人嗰種囉。 嗰段時期亦都係我喺三藩市KTSF26台睇《勝》劇，當然總會有樣學樣，但係隔咗咁耐再諗返吓，就唔再係咁做囉，而且我雙手又唔係最穩陣嗰啲，往往喺洗牌方法上都錯漏百出，最後咪越嚟越少玩。 如果講到故事同現實嘅對比嘅話，至少喺北美地區嚟講，依家啲賭場管理層大至上已經唔會再畀啲江湖中人亂咁搞事，包括勒索、仇殺、恐嚇、綁票呢四招嘢，遲早畀人通晒天，最終呢班人唔敢做得太過份；當然唔等於亞太區會跟住北美嗰一種處理方法啦，而且時不時都仲係有好多非法賭博場地成為黑白戰場，或者幫派施殺嘅觸發點。 另外，喺賭場舉行嘅大型比賽中，唔好以為冇人會忽略咗閉路電視至得㗎？ 仲有呀，除咗嗰啲之外仲有特別為電視轉播所需嘅特別安裝喺賭枱啲鏡頭，同埋其他專拍選手嘅鏡頭，都可以用嚟防止有人出「老千」出術，就算有人想反賄都好容易畀人爆料啦，嗰啲老千仲點會唔容易露面咩？！ 尤其係嗰啲上晒賭場嘅黑名單，想入去賭都唔會畀佢哋留底。 最後，如果有睇WSOP嘅觀眾，你哋理應留意到冇人會啲啤牌亂咁拋上天，因為喺正式比賽邏緝上咁做係準備即時被取消資格，唔理係賭客或係賭場工作人員都唔可以咁做，而且仲會搞到啲工作人員執牌都執唔切，非常之麻煩兼拖漫時間。

由此可見，有時候我哋喺電視劇睇到嘅嘢唔係完全同現實生活一致嘅，尤其係所謂嘅「賭術」係咪真係咁似喺比賽場地見到啲一模一樣呢？ 希望你哋見到我從綜作簡嘅解釋會清楚咁分辨出嚟啦。