中港之世紀世代分道揚鑣

好耐之前我曾經寫過香港前途嘅展望，嗰陣時仲以為自己出生之地會稍為平靜，點都估唔到由2017年至2020年嗰三年，狀態比想像中每況越下，甚至乎政局變得更加嚴重及可怕，之後嘅三年幾嘅時間因為又一次嘅疫情導致該市嘅經濟一撅不振，並且惹起曾經簽署主權移交嘅英國同埋西方社會嘅極度不滿及強烈譴責及抗議，尤其係自從歐洲爆發一場不義之戰將整個政局更加僵化，以致曾經自冷戰結束後似乎和解咗外交狀態因呢場仗而再次分裂晒。 曾幾何時我同媽咪有個心願係喺有生之年可以返去香港走轉，並且可以同啲舊同學或者仲留喺香港嘅舊友聚會，但自從媽咪喺七年前（2017年）中咗風之後，呢個心願已經大打折扣，依家再加埋香港政府喺呢段時間不斷咁公然侮辱及無理指責泛民陣營搞破壞，仲要搵班鄉下佬社團份子喺幾個地鐵站內以暴力襲擊手無寸鐵嘅民眾，甚至乎拉晒班搞緊泛民議員，並且喺毫無跡像之下推翻區議會選舉結果，仲要將所有支持泛民嘅任何人都要拉晒，連國際主權都冇件事兼繼續「戰狼」，再離譜嘅仲要通緝喺海外做時事評論員，皆因某人叫港人唔去投票俾不義選舉。 咁呢個時候我就喺居家於美國諗緊，香港究竟發生咩事呀？對政府嘅政策有所不滿究竟係犯法？「撥亂反正」嘅係以暴力鎮壓嘅香港政府？仲要只可為揭起不義戰嘅外國政權洗黑錢？

對某啲人嚟講，尤其係我家父，係越獨裁好，因為政權係「永遠是最好」，而且自由等同混亂，所以要「撥亂反正」；不過當社會被局限於政權嘅所有決定嘅時候，一旦有乜嘢頭暈身㷫或者稍有差池就會變成隨時墜崖而死，因為喺極權統治之下每個人冇得揀，以致個個都會滿手鮮血並冇人係無辜，尤其係嗰班獲得暴利嘅既得利益者，呢班人為咗急功近利而做啲唔見得光嘅事，可以連人命都不顧。 有一個論理讀者們必定要記住，廿幾年前嘅有一句對白到依家都好記得，唔單止係可以講及男女關係之外，仲可以用喺政治討論，呢句就係「凡事太盡，緣份勢必早盡」，而點解我會咁講呢？ 如果大家讀過清朝末期歷史嘅話，理應記得慈禧太后點樣對付好多其後被稱為「保皇黨」嘅一班改革派，以及革命女先軀秋瑾一班鬥士，最終大清朝廷係點樣下台㗎？ 如果唔係袁世凱嘅屬下威逼攝政皇太后隆裕太后頒布「退位詔書」嘅話，差啲變咗法國革命嘅中國版，朝廷上上下下都被集體屠殺處決。 依家中國共產黨做緊嘅嘢就同慈禧太后、明朝整個執法部門都變本加厲，尤其係當一個政權俾平民嘅印象係做到「球迷、球員、球証、足協都係你」嘅時候，唔有人話：「你玩晒啦！」都唔得，因為佢哋係將原有嘅法律變成名不正則言不順嘅狗咬玩具，明明行東嘅你就搞到行西，仲要話個地圖係錯晒之外仲想做出版商，咁嘅心態你唔單止唔會傾到乜嘢出嚟，仲會俾人話係咪撩交打。

咁你會問究竟幾時中國變成咁蠻不講理嘅地步，咁就要先講吓該國國家主席習近平嘅生世，習近平係曾任中共中央西北局書記、全國人大常委會副委員長等職嘅習仲勛嘅次子、仲勛嘅第二任齊心嘅長子，雖然習仲勛係佢嘅生父，但係思想上就同佢生父相反，仲同事任國家主席毛澤東相當相似，唯獨佢嘅學力唔及毛老邪咁好，畢竟毛老邪有讀過四書五經嗰啲書籍，有啲事佢仲有啲分寸，習近平相反話就打造自己為「改革派」，實際上佢對民主改革完有冇興趣，兼且連半點同情、慈悲及憐憫都冇，所謂反腐都只不過係個號，甚至乎可以話對佢嚟講，所謂包容等於亂黨，所以佢嘅心態根本就等同一條喪屍。 最好嘅例子就係無端白事就將全部住喺外國嘅華僑當係「中國人」，問題係佢係連乜嘢叫做「入咗外國國籍」當冇件事，只要個種族似就等於佢哋就係佢嘅國民？ 阿習生，你唔代表我，我就算俾3K黨屠殺都唔會再認自已係中國人，點解呀？ 因為我生於英屬香港，十三歲離開嘅時候都仲係英屬香港，而且我早已入籍於美國，所以我已經唔係中共嗰種不知所謂嘅套辭話我係「中國人」，再者我萬分討厭中共所認定嘅文字為中國文字，淨係喺文化上簡直係九唔搭八，更加唔好講睇極都睇唔明白，連所謂嘅「普通話」梗係講到半桶水；更重要嘅係中共政權對香港人嘅𠄘諾去𨶙晒邊呀，我哋猛咁勸你們班柒頭聽「我哋要普選而唔係『小圈子選舉』！」你哋喺咁多年嚟喺度搞乜嘢出嚟呀？ 普選一拖再拖遙遙無期，叫你哋唔好亂改高中考試試卷，你哋仲喺度加啲黨大故，我哋叫你哋快啲平反「六四」，你哋反而加重嚴防悼念兼重判政治犯，叫你哋一視同仁去打貪，你哋反而走去通緝一個永遠唔會返香港嘅英籍印尼華僑後代時事評論員？ 你哋仲要想刑事恐嚇每一個為真理發聲聲討你哋中國共產罪犯集團嘅惡行？ 聽清楚呀，唔單止我唔會離開美國並回流香港，咁鐘意搞分化？我誓死唔返香港，吹呀！

如果你問我究竟中港矛盾係幾時正式成為分水嶺呢？ 我諗個分水嶺理應喺我十歲（1986年）嘅時候就已經開始，但係個轉淚點就唔使問阿貴落喺1989年5月中，柴玲同王丹會晤時任中共總理李鵬拗到火紅火綠，導致談判最終破裂嘅就係老鵬喺個記者招待會上噏咗一句有彎轉嘅說話，將所有示威人士定性為「動亂」，呢兩個字一出即係等於要鎮壓，最終就喺1989年6月4日清晨時分重兵鎮壓，有啲知道「此地（天安門廣場）不可久留」嘅部份學生已經靜雞雞咁離開咗並返去校園，但有啲就擋避不及而中鎗，生死未卜，有啲仲要遛夜送啲受傷人士去急救，但係究竟有幾多係救得返到至今都唔知道個數字，但係好肯定嘅就係嗰六七個禮拜滯留喺天安門廣場，冇一個有咩嘢心理準備事情會搞成咁血腥，更加唔好講佢哋亦都無乜武器喺手用嚟自衛，咁你話俾我聽點解嗰班屠夫仲可以升官發財㗎？！ 依家仲變本加厲，搵班出外工作嘅旅客向全世界播病毒，搵埋班鄉黑嚟到元朗嘅地鐵站助陣襲擊返緊嘅手無寸鐵示威者以及平民百姓，毒奶粉搞到走去猛掃晒正貨奶粉，「乜嘢抗爭都要瓦解於組織時期」，如此類推，換句話說即係中共一統化玩晒啦！ 又要威又要帶頭罩，前言不對後語兼九唔搭八，呢個正正就係中共辦事手法，最好佢哋就樣樣嘢永續贏晒，其他人就死咗仲反而咩住「莫需有」嘅罪名都唔知點解。 自1949年以嚟，冇一樣嘢都唔係俾共產政權玩到爛晒，包括電視牌照申請、護照、經濟、示威遊行、出版書籍等等。 咁樣落去，根本上冇人會受你玩，因為所有規矩係一面倒咁遷就俾中國，咁本地人吃乜嘢先，穀種呀？ 定係變灰燼呀？ 以前細個嗰陣喺香港住嘅時候，我至少唔會因政治立場而受到打壓，除非你係嗰班左派暴徒誓死去推翻時任港英政府，依家呢？ 我未開口投訴某樣施政就已經變成失蹤人口，咁你仲要個憲法條文做乜𨳍呀？ 不如個個攞住把菜刀去亂咁劈友、隨便亂咁倒啲汽油去縱火、見到人就強姦雞姦啦！ 一個冇法律嘅社會就係乜嘢都無法無天，乜嘢都小提大做搞到一發不可收拾，最後個個都冇公德心，就好似中國自從1949年之後嘅頭卅年咁，乜嘢道德倫理打到爛晒，取而代之嘅就係個個顧住權力攞到盡，就算整個國家得番一班腦殘嘅癲佬兼且長江三峽及黃河嘅水全部因染晒鮮血同唔飲得都在所不惜，咁嗰個國家仲住得人嘅咩？ 國家級嘅青山醫院就差唔多啦。

總結一下，問題奶粉、爛尾建築、串底經濟、整體人格毀滅、極端政權，喂！如此類推，你可以試想一下咁樣嘅生活，除咗變成一班完全冇腦嘅奴隸之外，我就真係唔知呢種社會仲可唔可以再住得人，或者可以咁話，香港將會成為一個城市變咗一個邪教魔城，盲目咁追隨一個唔會理佢哋死活嘅「偶像」，仲將事實同真相都顛倒晒，最後咪又係做咗一班文盲去闖禍，呢個就係香港嘅終極悲劇。 信不信由你，但係以現時嚟睇，除咗呢個結論之外就冇其他㗎啦。