今年喺我由香港嚟到三藩市定居嘅三十五週年，冇諗過我會留喺呢度咁耐，更加估唔到我遇上嘅事比香港更加多，並且仲係比相像中非常之複雜，當然有啲更加留下深刻印象；不過我能夠捱到咁耐都算係一個奇蹟，恕我直言，我自己唔算係一個好學生，或者我嗰陣時適逢係顧住適應新環境，仲有當時都未有任何時間俾自己療養因前一年受到欺凌事件後遺症，導致咁多年嘅情緒發洩問題，從而令我喺學校入面受到批評我嘅學習態度同埋脾性都喜怒無常；儘管至今喺工作態度認真積極，但喺其他方面總係缺乏安全感以及尊重，唔係嘅話早就讀得好並賺得比現實上更多錢， 不過咁都俾我過到骨嘅話算賺咗㗎啦。 亦因為咁我就想同大家分享一下我喺香港最後嗰幾日到三藩市生活卅五年中一啲點滴同埋感覺， 你可以唔同意某啲評論，但係唔可以否定晒我嘅存在及影響力，雖然我只係一個茂俚嘅啫。
照原定嘅願望我係應該諗住過去我嘅出生之地旅遊一兩個禮拜，睇吓究竟仲有乜嘢地方同以前冇乜變過嘅，又或者見吓一啲仲喺香港嘅一班老同學聚吓舊吹吓水，但係越諗得理想嘅計劃，總會有人諗住搞分化搞破壞，而且仲會係破壞得好徹底，睇嚟呢個願望永遠都唔會實現㗎啦，因為有一個又嘈又沉氣又死板嘅狂妄自大嘅霸王當全世界都欠咗佢唔知乜嘢，於是就不惜一切去將仍然盛世緊嘅經濟發展以「打貪」為理由以恐怖手段去打壓任何異見人士，直至俾佢主宰全世界一切，仲要取代創造宇宙嘅真神，試圖改寫歷史同埋宗教信仰。 由於我屋企嘅背景，尤其係我點會喺香港出世同埋渡過我嘅童年，聽到咁樣嘅新聞就真係覺得點解香港唔再係我記得嘅地方，因為有人想做宇宙霸主將全世界攬炒。 咁樣就惟有留返喺美國當係我屋企，而且我喺香港除咗一堆傷心史之外就冇乜嘢留戀嘅嘢，除咗嗰陣時仲喺度諗住好似仲有一科（英文作文）未考完試，不過當我被帶去校區大樓登記並面試後，睇嚟嗰科考試都唔使諗住以傳真形式考啦，而事實上又係嘅，一到達咗美國之後，香港嘅嘢已經唔再關我事，專心諗吓點樣適應新嘅環境啦。
喺香港由出世到十三歲離港前，若果冇記錯嘅話，除非自己年紀太細個，我冇乜經歷過「夏令時間」，但係一嚟到三藩市之後呢就要每幾個月就要改個鐘頭，唔係就搞錯咗時間，尤其係夏季時期會經常早咗起床，又或者喺冬季時期就瞓耐咗。 講真一句，細個喺呢度（三藩市）唔會點覺得有咩嘢改變，但係住喺北美咁耐就逐漸覺得呢種調整唔係太健康，尤其係瞓覺時間越嚟越頭暈，而且早咗一個鐘起身好容易傷風感冒；但係我亦都要承認有夏令時間喺三月至九月期間係多咗一小時嘅時間 — 尤其係六月至八月尾 — 活動，而放工都唔使咁怕過馬路，因為啲私家車好容易睇到行人，加上自己本身好依靠坐公車，啲公車司機都好容易認得出有冇人喺車站等車。 講到公車咯喎，如果唔係近年市政府終於對MUNI同埋整體道路作出適當嘅修改嘅話，我可能俾佢哋爆血管死𨶙咗啦，點解會有咁嘅反應？ 事實上我對佢哋嘅運作係又愛又恨嘅關係，我講件事出嚟就知道對當時嘅管理層係有幾咁仆佢個街，事原就大概喺2004-05年左右，我坐完當時叫38L公車到咗25 Avenue夾Geary交界處等29號公車返屋企，一等再等三等四等架29號仲停留喺Clement街嘅車站原封不動，等到成個鐘頭之後腳都軟仲等到好𨶙唔耐煩，於是就行落去嗰邊同個司機理論一番並叫佢快啲開車啦，上面嗰個站已經企滿晒人，仲停喺度做乜柒嘢。 嗰件不知所謂嘅司機嘅態度俾我同埋嗰啲坐喺度唔耐煩嘅乘客嘅態度真係沒齒難忘，佢當時點樣同我講呢？「我話幾時開車關你咩事呀？就算三年之後餓死晒車內嘅所有人都唔會早啲開，吹呀？！」我心喺度諗如果呢度係香港，而佢喺某個社團大佬咁樣講嘢，嗰個司機唔使旨意再開到公車都似，更加唔好講嗰個人係市政府部門主管，咁樣對乘客同上司咁講嘢，係咪好想博炒呀？ 我曾經亦都試過喺個車站對住條街鬧足半個鐘，因為同先前事件相似有人玩嘢，仲話要等領導先至開車喎，係咪想全站啲乘客俾佢哋嘅公司因公車司機唔肯合作而被炒之後搵到嗰條友玩集體訴訟呀？ 而講到公車囉喎，呢個真係天與地，因為我細個嗰陣時成日都乘搭雙層巴士，但係喺呢度係啲人連乜嘢叫做雙層巴士都未見過，反而係通街都係單層公車。 起初我唔係算幾慣，尤其係先行上梯級後再坐車位，而啲位係有啲似滑板，尤其係坐喺一架揸得快嘅司機嘅公車，分分鐘實越坐越唔穩陣，有時甚至乎飛咗出位都試過，夠唔夠恐怖？
但係講到好唔慣嘅就係地震，無它嘅，嚟咗唔夠四個月就遇上最兇險嘅事，心水清嘅都知道喺1989年10月17日發生嘅事，如果未聽過嘅話我就依家話俾你知，嗰日就係馳名嘅Loma Prieta Earthquake。 我記得嗰日同如常一樣返學上堂，至於上咗咩嘢堂就完全唔記得啦，但係好記得喺學校入面比起想像中更複雜，以前淨係對住啲同學就算幾好幾衰都仲可以溝通到，語言問題同埋遇上比新亞更邪惡嘅同學搞到我好難學到嘢之外，之前喺牧愛小學被欺凌到差啲痴咗綫變咗雪上加霜，但連佢哋以及自己冇諗過最恐佈嘅一日就喺嗰日坐喺姑媽屋企做緊功課時，突然間覺得地板不斷咁搖，隆隆聲響越嚟越大聲，當陣時附助我嘅表哥陪我一齊做功課知道有地震，於是就帶我去門撋避難，而細表哥就去咗熟房食飯枱同門度一齊同姑媽避震，當時我嘅表情係嚇到傻咗咁樣，但比起當年欺凌事件嘅惡夢更得人驚，因為越震得耐就想走都企唔穩，差唔多等同於進入咗生死之關，咁都執返條命就真係感謝主啦，不過嗰晚越震就越喊得勁，直到我係喊到瞓着咗為止。 第二朝早起咗身完早餐之後，外公就帶我去華埠行一團散吓心，因為校區要檢查晒所有學校嘅建築物結構而停課幾日，嗰日坐公車亦都遇上同樣情況，所以去市中心嘅地下車站亦都封埋兼且將公車移上地面。 自從嗰日之後我對地震有種過敏反應，每當我感覺到震動即時知道地震嚟咗，甚至乎連輕鐵路行過都當係地震處理，卅五年嚟經歷過大大小小嘅地震起碼有過百個，除咗1989年之外都有成十個，最勁嘅就係2014年8月中喺半夜三間發生嘅Sonoma地震，明明瞓緊覺就俾佢震醒咗，幾個鐘之後返去教會時都仲係半夢半醒狀態，其次就係2021年嘅Sierra山區發生嘅地震，當時我同我同事上班期間突然之間覺得咁鬼震，有啲未有嗰種經歷當然嚇到傻咗，我就反而想知道邊度傳嚟㗎。
飲食習慣方面，起初我都唔係食得好慣，其一，我發現好多人都好鍾意食辣嘢，尤其係東南亞地區同埋中美洲，更加唔好講話印度：咖哩之首，連四川菜都有辣嘢食物，我雖然算係有食過少少啦，不過我嘅哮喘病喺到達美國嘅初時經常發作，經過多年嘅治療都係少咗一啲嘢令到我冇咁怕凍，咁我媽就每日喺啲餸度加啲薑片，有時仲飲啲薑菜水，自己亦都要克服怕辣，於是就加多啲胡椒粉落去，至少攞嚟調吓個味，包括意大利薄餅或者泰國菜或墨西哥包（不過都喺忍著個麻辣味過晒先至可以，兼且仲要隔幾年先至去食，唔係就買啲Doritos Nacho Cheese chips嚟頂住檔囉。）。不過講到邊啲餐係我至愛，首先逃唔過嘅就粉係麵類，尤其係意大利粉、日式拉麵（包括烏龍及蕎麥湯麵）、越南粉麵同埋山東拉麵，對我嚟講呢幾種麵各有各特色，自己都會自己烹製前兩三種，當然就唔係好敢食辣味，驚住頂唔順啲辣味。 至於美國快餐就緊係無可抵擋啦，不過多數都係食麥當勞多啲，但亦都唔介意試吓附近一啲舊式餐廳，包括Mel’s Drive-In、Denny’s、IHOP、Red Robin同埋Shake Shack等等，但係如果自己唔想去太遠嘅話，我住嘅嗰區都有唔少獨立經營嘅快餐廳，因為比起嗰啲大財團操控嘅餐廳，呢啲小型餐廳嘅食物比較大份啲，價錢方面都算唔錯啦。 另一方面，自從媽咪中風之後，我對烹飪嘅抗拒開始解除，之前咪講過我有整意粉嘅，我亦都開始做自己嘅中菜，不過用咗唔少嘅調味料，但係始終父親成日話我唔識做菜，以為我喺度做衰佢，不過對住一個花咗唔少時間睇烹飪節目，所以就對佢嘅抗拒甚為費解兼頭都爆啦；另一方面就係由於我係成四十一歲先至下廚，至少喺依家嚟講我嘅目標就係為咗生存為首要目標，咁其實喺呢個過程中亦都領悟到多年嚟媽咪花咗幾多時間、心血、辛酸同埋功夫做出各種各樣嘅菜，所以我覺得好感恩。
如果講到我嘅情史嘅話，倒不如話我成日都俾人當傻瓜囉嚟搞，因此我總有個感覺好似老天總係唔想俾我結婚，或者正因自己父母嘅婚姻關係唔算太好，尤其係自從我出咗世之後，成日都為咗錢就拗大交，又唔肯為自己做錯咗而認錯，仲要乜嘢都要認威認勢認叻喎，直頭當全家同姑媽、姑丈、同埋外公冇功勞，講真話，冇班遠親同埋姑媽姑丈同外公嘅話，連我自己都喺香港做乜鬼。 雖然我唔算係最好嘅學生，但至少我係肯做嘢，就算係有啲嘢做得唔光彩。 雖然我交過好多朋友，唔知係咪由小六欺凌事件嘅發生，我梗係唔敢對其中一個老友剖白心聲，更加唔好講呢咁多年發生喺我身上嘅唔好嘢囉。 2003年本來係搵到一個喺內地嘅女仔並發生咗關係，以為咁就可以帶佢嚟見家長，點知一個禁令搞到要脅我報消咗呢個念頭，並且喺嗰段時期人財兩失仲要係損失慘重嗰隻，就算依家搵到都有排從新嘅女朋友都有排賺唔少錢，因為咁我感覺自己好難再信任何人，亦都因為喺教會遇上有個不知抬舉嘅一條八婆，嬲起上嚟係會搞到非常絕情，呢吓嘢就算傷咗友情都辦洗，鬼叫有人得罪我在先，唔好怪我爆粗鬧人。
最後我想分享嘅就係一個估唔到我會掛住口嘅話題，但係嚟到美國生活之後就領悟到乜嘢叫做「你唔理政治，政治唔會唔理你」嘅意思，尤其係面對一班極端「保守」勢力想將以往嗰種種族歧視及隔離主義攞返晒出嚟，並強制落去早已變化緊嘅美國社會，最終目的就係進行種族大清洗，直至國家得返純種白色人種存在為止。 至此我先至開始留意吓究竟美國政治新聞，並且參與過投票站嘅工作，從而對社會嘅不公進行思考。 雖然我唔會話自己係個「專家」，不過有啲嘢一睇就知道有乜嘢係合乎邏輯，有乜嘢係背道而持，邊個成日喺度死雞撐飯蓋仲話人fake news（假新聞），邊個苦口婆心同你講真話，其實好容易睇得出，只不過係肯唔肯聽，呢個唔單止用作於勸說之外， 評論政治嘅時候更為明顯，尤其係面對一啲完全唔理會真假之辯，一尾就亂噏廿四兼仲要喺度叫人跟蹤陰謀論，遲早就唔累街坊就假咯。 你一聽到咁就知道點解我誓死都唔投俾邊個鼓吹極權統治嘅候選政客，因為嗰班人只會最終搞足一個永無寧日兼一頭煙嘅爛攤子，最出名咪就係Donald Trump囉，成日猛咁吹自己幾威，但係心水清嘅一睇佢啲數簿就知道呢條友有幾廢，由賭場到地產再加埋USFL（美國美式足球聯賽），佢掂乜就柒乜，全部都欠債累累而執晒粒，滿口都係一堆大話你哋班友仲撐佢，遲早俾佢害𨶙死都唔知發生咩事，等同自挖墳墓一樣，俾佢用完就被棄用，你知唔知㗎？ 曾經有人同我講：「選總統等同選垃圾一樣。」我都係嗰句回覆嗰位教會弟兄：「你呢次揀錯人隨時命送黃泉。」因為我已經知道Trump實會想搞獨裁政府或者係做個皇朝，而且仲會搞埋世紀上超級種族大屠殺，直至得番啲冇晒人性嘅白人至專嘅宇宙。
由一個「鄉下仔出城」到一個經歷過咁多起與跌嘅中年人，有啲陌生人仲唔係幾明點解我仲喺人世做乜嘢，我可以同呢班人講，當你經歷過我嘅人生時，如果仲認為我應該唔喺世上，你永遠唔會明白點解乜嘢叫做「永不言敗」嘅理念，或者呢啲嘢亦都係我嘅固執，但就係呢種感受令到我仲喺呢個世上生存到，成唔成功就另外計，呢個就係我嘅感受。