「9/11」三十一年嘅回憶

喺我未開始呢篇憶述之前，我好坦白同你講，我做咁耐人而嚟對於生離死別喺9/11發生之前已經係好熟面口，經歷過由外祖父母嘅離世到兩次大地震，但係對於恐怖襲擊喺美國國土嘅話，喺9/11之前就只有1995年奧克拉荷馬城爆炸案同埋1993年世貿中心爆炸案。 同絕大部份嘅美國人一樣，冇人會想像到恐怖分子會用民用航機當作軍火箭，更加唔會估到會係晨早流流就搞單咁大鑊嘅嘢，更唔使講造成嘅破壞同埋其後嘅發展；不過無可否認嘅係美國自從嗰日開始，「加速主義」、「超光速主義」、「意識形態嘅爭戰」等等嘅詞語就唔知喺邊度蹲出嚟，搞到分離主義滲透入去主流社會，最終導致社會分化。 雖然我較早前喺英文版略有記載過，不過最終決定重新再寫過，但係當中我係覺得有啲甩漏咗啲重點，所以我會喺呢篇文章詳細記載一下，希望各位讀者能夠了解多啲關於當日嘅情況係點樣。

要講到9/11嗰日之前，就要講番轉頭去之前嘅環境，否則就唔會明白點解當日嘅影響咁深遠；亦喺同時我都要提及一啲喺嗰個時段離世嘅人物，但係唔關乎嗰日嘅離世人數，只不過係佢哋好彩冇當眼目睹整個過程，當中包括早於2000年2月離世嘅本人嘅外公、翌年喺代托納國際賽道（Daytona International Speedway)上為咗護駕前兩名車手而喪命嘅Dale Earnhardt Sr.,、同埋喺美國版嘅《超級戰隊》系列嘅首位黃衣女戰士喺一次嘅交通意外而離世嘅Thuy Trang（垂莊）。 點解我會揀呢三個，因為佢哋三位都算「好彩」冇睇到9/11嘅發生，尤其係外公，我真係唔敢想像喺恐佈襲擊嘅同時睇住外公中風，淨係處理外公離世嘅事已經夠晒煩，再加埋真係仲得了；咁事實上當然除咗呢三個人之外，肯定有好多健康有問題嘅人因為睇到紐約咁樣冇咗世貿大樓，突然之間嚇到心臟病或者中風都有，更加唔使講精神崩潰；至於Earnhardt，如果佢唔係早七個月離世嘅話，我唔知道佢嘅反應會係點；至於Thuy Trang嚟講，佢嘅離世實在嚟得太突然，我亦都唔知道若果Trang聽到咁嘅消息會點回應，但係我諗佢嘅心情都唔會咁好啦。 另一方面，喺早幾月前我喺Spotify聽到一個好奇怪嘅案件想喺呢度分享一下：Sneha Anne Phillips喺9/11之前幾個小時突然間人間蒸發，由於失蹤嗰晚離恐襲案嘅時間太接近，唔單止至今呢位醫生嘅屍體仲未搵番，兩次刑事調查都搵唔到任何綫索，更導致要鬧上法庭爭取將佢個名加入去9/11死者名單。 到依家嚟講就只有呢個結論： 連佢係點樣失蹤都成疑問，就算真係搵到佢遺體都可能要幾十年撿驗到所有殘跡。

喺9/11仲未開始遇上襲擊之前，紐約巨人美式足球隊啱啱由丹佛飛過夜機返去Newark市機場冇幾耐之後，美國航空11號班機就隨即起飛，冇人包括嗰隊球隊在內點都估唔到跟住落嚟所發生嘅事，更加唔會估到當日嘅破壞力會係幾嚴重，更加唔會估到嘅係一個危急關頭嘅決定保住咗更多美國人民嘅生命。 當日喺紐約陽光普照，有兩位年青兄弟組合拍緊關於當地消防人員嘅記錄片，原本呢一日嘅主打新聞係當地市市長選舉，當地市民依舊過佢哋嘅生活做生意返工，而喺嗰兩座世貿大樓同埋附近嘅酒店，大家都為咗新一日嘅工作作出準備功夫，而喺肇事嘅幾部客機內嘅乘客，絕大部份都為咗唔同原因由紐約同波士頓飛往美國西岸，點知就喺起飛之後冇幾耐，佢哋亦都估唔到呢次旅程嘅終點竟然係直插世貿陪埋兩座巨塔一齊陪葬，但就喺最極為冇可能嘅事發生咗，因為喺肇事嘅幾部客機內有至少四、五個不速之客混入其中，十九個來自沙特亞拉伯嘅阿爾蓋達組織恐怖份子假以飛行學生身份入境，當日之前嘅幾個多，佢哋接到命令以客機為飛彈，目標就係用盡方法將世貿大樓夷為平地，如果連埋乘客一齊送命，喺佢哋嘅角度，「無任歡迎。 你冇聽錯，呢啲中東組織嘅恐怖份子成日都認為西方國家係為咗石油而去狂搶當地財富，所以呢班人就想以焦土政策嚟征服全世界，不過呢種咁𨶙短視嘅政策其實等同如此北韓呢種獨裁國象一模一樣，以極端暴行統治所有人民，但係佢哋呢種執着最終係會負上同類嘅報應。

美航11號撞入咗世貿中心北塔被嗰兩位攝錄師拍到，好多人包括正在瞓緊覺嘅我都以為係「撞彩」或係意外，嗰陣時我轉咗去做文員工作，而我係點樣聽到咁嘅消息呢？ 咁就要講番外公離世之前我個枕頭隔離放咗一個收音機鬧鐘，而嗰陣時我係開住遛夜聽KNBR AM680電台講體壇新聞；返回當日清晨，嗰架收音機播緊清晨節目，當時嘅主持係最近呢一、兩年退休嘅KRON4 電視台體育新聞總監Gary Radnich，喺北塔未受襲之前仲喺度講緊Barry Bonds追擊緊全疊打紀錄，突然間就講到遇襲嘅消息，我嗰時仲以為有咁啱得咁蹺啫，點知喺十幾分鐘之內同樣嘅事撞擊咗去南塔，我心諗好唔啱數就隨即起身衝去開電視睇吓究竟係發生咗咩事。 至今為止除咗我姑丈姑媽同二表哥Donny Wong之外，我同父母3人都未去過紐約市，所以喺未有機會去過世貿雙塔之下，發生咗咁恐怖嘅恐襲令我有種感覺，以後都冇嗰一代嘅世貿大廈，點知我嘅預言喺兩個鐘頭之內應現咗，因為美航11號同埋聯合航空175號班機（兩架都係波音飛機767形號）兩部航機係裝滿晒燃油之下撞樓，而世貿嘅設計完全冇預計過會俾新一代客機成為武器去撞機，於是兩座因鋼鐵受咁大熱能弱化支撐，最後分別半個鐘頭後倒塌。 有啲人實會諗緊關於9/11嘅所謂「陰謀論」，包括美國中情局或美國政府裝炸彈嗰啲廢話，但係世貿中心嘅建築比起其他較早之前嘅樓宇，最大分別嘅係，以帝國大廈為例，地基係用類似花岡石嗰類嘅巨石，而牆壁仍都係建立得幾厚，石同磚之後先至見到鋼板I-beam，呢種設計嘅好處就係就算有飛機撞到樓宇時，你至少有足夠時間逃離現場，但世貿先係鋼鐵包圍再跟住另組鋼鐵加水泥混形上，問題係點解係嗰刻先至咁受唔住熱能呢？ 好簡單，當機身撞入咗大樓時，牆壁嘅鋼鐵刺穿咗燃料府，大量燃料就隨即被火花點着晒，啱啱好就撞正咗電梯部份，燃油滲埋落去電梯槽內，燒晒啲電綫電纜，同時亦都軟化咗地板下嘅鋼鐵支撐；當鋼鐵熱到一個階段之後就開始撐唔住，最終導致兩座大廈分別倒塌，鋼鐵、石屎、家俬、石牆等等嘅成為塵埃雲從高處墮下，千幾二千人仲喺被撞位置嘅嗰幾十層樓上唔係都被燒光晒就係俾煙雲焗死，再唔係就跳樓死，依家仲撈埋啲塵埃雲一齊降落去。

當日決定將所有嘅客機叫停嘅美國聯邦航空總署全國營運管理官班·史林尼（Ben Sliney）。 當日史林尼已經喺FAA做咗好幾年，啱啱嗰日係佢上任全國營運管理部長嘅第一日，連佢在內都以為哩日嘅運作會係好平常，但係正當佢入咗去會議室開會冇幾耐，佢嘅副手就收到美航通知該公司嘅11號班機被騎劫，於是史林尼就叫晒單位人員專諸架航機嘅動向，而騎劫嘅消息係點樣傳出嚟呢？咁就要多謝兩位機艙服務員——艾米·斯威尼（Amy Sweeney）和鄧月薇（Betty Ong）。 當被劫嘅航機飛近紐約市嘅時候，劫機犯就關咗飛行應答機，令到FAA同埋鄰近嘅機場搵唔到架航機，直至以每小時750公里（包括10,000 U.S. gallons (38,000 L; 8,300 imp gal）直撞入去世貿北塔北立面第93至99層之間，機內連埋嗰六層嘅1,366人在飛機衝撞樓層或之上，唔係當場被燒死、俾燃燒緊嘅燶煙焗死、又或者由千幾尺跳樓至死，有啲仲係其後雨塔倒塌後俾燃燒緊嘅物件壓爛兼燒成灰燼。 當陣時喺FAA總部內嘅有啲人員就開咗電視時，佢哋見到世貿北塔燒得好猛火，但又搵唔到追蹤緊嘅航機，點知一波未完一波又起，另一架航機（聯航175班機）遇上同類型嘅事件，部長就開始覺得事態嚴重，但係人員仲喺度搵緊11號班機，於是佢就搵空軍嗰邊幫手，咁都唯事已晚，因為175號亦都遇上同一個命運，不過撞嗰陣時就好似鋸樹咁打斜撞，大約590英哩（750公里）撞上第78樓（南塔的空中大廳）至84樓 ，機上大約還有10,000加侖嘅可燃性航空用油，唔使講，又多咗幾百名員工加埋機內所有人都走埋啦。 呢個時候Silney就要作出一個決擇：一係就繼續俾客機如常運作，但可能會繼續俾恐佈份子以騎劫將裝滿燃油嘅航機進行毀滅性嘅破壞遍滿全國；定係暫停所有航線起飛，俾FAA同空軍追蹤到其餘被劫持嘅客機，就算俾唔少乘客幾日不便，至少唔會死更多人。 Silney果斷咁決定後者為上策，喺唔夠兩小時之內不但逼降數幾十萬國內航線，就連嚟美國嘅國際航線都同時被折返原地，直至搵到嗰兩架客機為止，但阻止唔到美航77號班機撞毀五角大廈嘅其中部份，不過喺聯航93號班機嘅乘客已經收到紐約同DC嘅消息，於是有部份乘客就密謀反抗，最終該班機喺上午10時03分墜毀於賓夕法尼亞州尚克斯維爾鎮附近一處採煤田場，機內嘅44人全部罹難，包括有啲仲係早已俾恐佈份子殺死咗。

如果我冇記錯嘅話，我企喺電視機前面差唔多成個鐘睇住事件嘅發展，一方面覺得惋惜而另一方面就係無助，而且仲覺得難以置信咁嘅事會發生喺美國國土，而且恐襲啲消息仲不斷咁嚟。 首先就係離首都華盛頓唔遠嘅國防部五角大廈受到同樣嘅襲擊（美航77號班機 – 波音757），然後聯航93號班機（另一架波音757）就俾機內嘅乘客反抗而被迫喺賓夕凡尼亞州嘅一處採煤田場墜毀，機內所有人冇個生還，不過我仲未聽到嗰啲消息之前，我食完早餐之後就坐巴士返工，我大概已經知道嗰日唔會好似平日咁忙，但冇諗過嗰啲消息出晒嚟之後，個個住喺東灣或者北灣嘅同事就嚇到傻咗，因為驚住過唔到金門橋或者灣區大橋，所以佢哋就趕時間返屋企。 咁我同埋有幾個住喺三藩市市西部社區嘅同時就留低，直至夠鐘走人先至返屋企，不過大家都係諗緊究竟呢次襲擊仲有乜嘢後文，除咗平常節目包括體壇盛事都暫停咗之外，其他嘅就係仲有幾多人因為吸得太多啲塵埃雲，不論係救援及善後工作，定係當日喺街道上目擊到世貿中心倒塌嘅民眾都毫不幸免。 當晚嘅夜間廣播冇個台唔播世貿中心廢墟善後工作，而且仲係大致上連續幾日都係播住嗰塊地，但事實上就唔單止嗰啲嘢，而且仲有嗰五、六百幾個乘客、機組人員，以及嗰八條仆街恐怖份子嘅骨灰，再加埋嗰幾十層入面嘅職員同埋工作人員，包括經紀、會記在內，嗰啲為咗唔想被燒死而跳樓嘅死者，最後就係為咗拯救及疏散雙塔人群嘅警務及消防人員。 嗰日雖然係死傷慘重，亦都有好多人被疏散到冇受到塵埃雲嘅地方，但係亦都係因為呢件慘劇，無形之中團結咗整個城市。 紐約市內邊個想幫手就隨即想盡辦法趕去，就算幾困難、幾渺茫同幾危險，唔理佢哋嗰日之前做過啲咩嘢，總之有一綫希望都要盡力救援，就算係收屍都在所不辭；當然嗰陣時世貿遺址嘅空氣質素實質根本上同切爾諾貝爾核事故係過之而無不及，因為塵埃滿佈包括石棉、鉛、鋁、燃油等等嘅有害金屬，仲有死者嘅灰燼同埋玻璃等等，但竟然當局竟然話啲質素係可以接受，結果就係呢所有曾經呼吸困難過啲塵埃感染各種唔同嘅末期疾病，仲要因為其後市長臨時改變主意搞到警務人員同消防人員搞出個大龍鳳，如果唔係名鍾·史超域（Jon Stewart）喺歷年嚟不斷為呢啲受害聲援，我諗好多救援人員一早就冇晒命，其中一個救援人員就係曾幾何時受訓四年，但其後成功轉為一個荷李活演員，呢個就係Steve Buscemi（史提夫·布斯美）。

當我聽到有啲暗謀論話世貿係俾人裝炸彈去嗰幾層，我對言論就喺度諗：「人佬呀，有冇人真係會咁𨶙笨會諗到呢啲提意至得㗎？而且仲要裝幾多炸彈先至令到成座樓會倒塌或咁先？」換言之，只有客機內嘅燃料先至做得成，問題係要點樣形容作為參考呢？諗咗好耐，直至我記得睇咗關於一級方程式賽車時，咁我終於明白點解。 原理好簡單，如果架車係裝滿燃油嘅話，當架賽車撞翻咗嘅時候（我指嘅係1960-1983年年代嘅賽車，依家唔會再有咁恐怖嘅場面），車手同架車都同時燒青光，試想下如果將呢個例子乘200倍，答案就只得一個：世貿雙塔一夜之間消聲匿跡，被撞爛嗰幾層全部燒成灰燼。 同一道理，五角大廈保安咁嚴密，邊個會咁笨柒會喺嗰度裝炸彈咩？ 所以我點解對好似Alex Jones同埋Glenn Beck呢班廢物亂噏廿四甚為反感，因為呢啲言論唔單止係浪費時間，根本上就同現實脫鬼晒節，就算你點同佢哋講事實真相都聽唔明，皆因佢哋寧願聽晒啲政治詛咒都唔會聽真話。 雖然呢件事已經過咗廿一年，當中亦都包括一啲事件本來唔屬於當日嘅悲劇，但唔知點解會算落去9/11，而且仲係一爆就爆三單奇案，其中以較早之前稍有提及嘅Sneha Anne Philip失蹤案至今仍然唔止仲係個謎團，連究竟佢嘅私生活係點都成為日後嘅爭議點， 時至今日，連搵佢嘅任何綫索都冇，就算法院喺2008年終於加咗入去世貿死者名單，呢個謎團仍然未能解開，例如佢嘅婚姻係咪真係咁完美，究竟佢有冇遇上一啲仇家之後被遇害呢？另外一單案件同Sneha有半點相似，一樣都喺9/11扯上關係，一樣都依家都係一個謎團，但唔同嘅係死者遇害地點係曼克頓嘅對面海灣區叫做布祿崙（Brooklyn），死者遇害日子正正喺正恐襲當日，佢就係一個波蘭籍移民Henryk Siwiak，而佢嘅案件係唯一一個登上當日唯一嘅罪案記錄（因為9/11嘅死者數字會擾亂平時喺新聞都聽到嘅罪案數字，原因係9/11係非比尋常嘅事件）。

最近喺Spotify同埋Stitcher聽到嘅一個人間蒸發嘅謎團，呢個謎團發生喺2001年9月10日，案發地點就喺曼哈頓下城（Lower Manhattan)嘅21世紀百貨（Century 21），不過有人實會問，點解個名會唔熟嘅？咁我就趁呢個機會先澄清吓，同名唔等於有任何關連，因為另一個Century 21係一間地產經紀公司。 肇事失蹤人士係一個印度裔嘅女醫生叫做Sneha Anne Phillip, 嗰晚本來佢係想賣完啲長裙、內衣、高踭鞋之後就返回隔條公路另一邊嘅住宅單位，但係一直都音信全無，連人影都唔見。 當陣時佢就因為提供假指控而被告上法庭，佢嘅猶太人丈夫交咗保䆁金之後就返屋企，做完家務並同佢母親上網詳談後就去百貨公司買嘢，由於當日下午係落陣雷雨，所以佢多數會乘座的士返屋企，但就唔知乜嘢陰差陽錯，Sneha買完嘢就竟然係人間蒸發咗，過咗幾個小時之後正正就係9/11恐襲，曼下城一帶因為世貿倒塌而遍地都係佈滿塵埃，電力供應嚴重不足，更加唔好講手機傳訊都成問題。 至於女事主，佢嘅失蹤逐漸成為一個謎團，而9/11嘅出現就製造好多至今都冇人可以答到出嚟嘅疑問，包括Sneha係咪俾人老笠咗呀？定係俾人撕咗票呀？定係佢喺世貿大廈同幾千個人一齊培葬呀？除咗法庭案件、信用卡結帳，以及保安系統攝錄落嚟嘅相片之外，冇人為呢件事而舉報任何綫索，連佢究竟去完買嘢之後去咗邊度都冇人知。 到咗廿一年嘅今日，是否佢仲在世都成為一大迷團，究竟佢啲裙同鞋去咗邊呢？定係佢俾人送入咗精神病院呢？冇人知，猶如佢被歷史遺忘咗，就算搵到佢，究竟係全屍、屍骨無存、精神失喪、精神改造入咗邪教，定係改名換姓過緊隱閉生活呢？仲有好多至今都難以解答嘅問題，包括9/11當日清晨4點幾一個離奇電話由家中電話打俾男事主嘅手機，保安鏡頭拍攝佢嗰陣時嘅時間有時差，甚至當日清晨6點幾時候拍攝到疑似佢嘅人像係咪Sneha呢？至今都未有答案，有可能呢單懸案永遠都唔會解答到。 不過我就有個推測作為假設，曾幾何時我聽聞過某啲宗教信仰為本嘅家族，因為家庭成員嘅一啲「取向」問題引起家族中某啲成員走去買兇殺人，雖然連呢個推測暫時冇證據顯示出嚟，但又唔係完全冇呢種可能存在，我僅希望唔好俾我估中咗。

最後我想提及嘅就係講咗咁多悲傷嘢，我諗係時候講番一件輕鬆嘅事件發生喺恐襲事件中，如果各位讀者有留意呢個網頁嘅話，肯定有留意到我經常提及過職業摔角，而今次亦都唔例外，不過今次嘅分別就係正當全球職業球賽大致上停頓咗一段時間，總會有啲個別組織做啲反傳統嘅活動做緊，咁事實上日日夜夜都係播Ground Zero只會令人越嚟越焦慮，而且仲係個個電視台都係咁喎，唔悶死人都唔得啦。 不過喺呢個時勢邊個真係會有咁多閒情逸緻想做「開荒牛」呢？ 點知原來真係有啲傻人做到出嚟，而且仲係一間如果最近有留意到有某間公司爆出個主席嘅醜聞，曾幾何時佢將同行嘅對手逐個擊破，而喺恐襲事件之前嘅半年，呢間公司收購到當陣時網路同有線電視台巨人《美國上網·時代華納》（AOL Time Warner）嘅摔角機構World Championship Wrestling（世界冠軍摔角），咁你就知道邊間啦啩？冇錯，呢間咪就係WWE（世界摔角娛樂，當時叫做世界摔角聯盟），而嗰位「傻人」（說笑啫）就係時任主席Vincent Kennedy McMahon。 事原就要講番9/10（亦都係Sneha失蹤晚上）WWE就喺聖安東尼奧（San Antonio）開咗一場節目，當晚所有工作人員同埋選手喺賽後到達休斯頓，為咗該日嘅錄影節目作為準備工夫，點知就喺中部地區時間7點46分就發生咗恐襲，咁McMahon同埋佢嗰班助手就喺主席嘅套房做緊嘢時，有人就急急腳咁開咗電視睇到個直播，佢哋一睇，全部異口同聲都話：「點會咁㗎，咁大鑊？！」當時嘅室內場地COMPAQ Center就同佢哋講：「為咗安全起見，我哋要關閉場館直到另行通知。」 呢個時候所有選手同埋管理層就有個決擇：留守休斯頓等候新時段嘅開展，定係索性取消當日嘅節目行程，但係Vince就諗起第三個選擇：「咁不如開場特備節目，一方面可以悼念呢次恐襲嘅死者，另一方面繼續做佢哋嘅節目。」於是WWE同COMPAQ Center嘅管理公司就定咗9月13日開個特備節目。 咁你實會問嗰個節目叫咩名？WWE Smackdown，我唔講節目內容搞咩嘢，因為節目嘅目的唔係平時咁樣推介下個月嘅比賽項目，不過呢個節目做咗一個創舉：首個非9/11關連現場直播嘅電視節目，而且仲係最快手嗰個。 當然有讚都有鬧，有啲民眾對此舉嘅批評係「發死人錢」，但係喺咁嘅環境之下你唔可以叫人乜叉都唔做㗎，而且連個主席都想為民眾做啲嘢，點可以怪責佢呀？ 我對呢件事就聯想起另外一次災難，而且仲係同我有關係，咪就係好耐之前提及過嘅1989年10月27日嘅棒球世界系列賽，因Loma Prieta Earthquake而推遲咗嘅第三場比賽，其中以廣播員Al Michaels嘅開場白係咁形容：

At this very moment ten days ago, we began our telecast with an aerial view of San Francisco; always a spectacular sight, and particularly so on that day because the cloudless sky of October 17 was ice blue, and the reflections of the late-day sun sparkled like a thousand jewels. That picture was very much a mirror of the feel and the mood that had enveloped the Bay Area and indeed most of Northern California. Their baseball teams, the Giants and the Athletics, had won pennants, and the people of this region were still basking in the afterglow of each team’s success. And this great American sporting classic, the World Series, was, for the time being, exclusively theirs. Then, of course, that feeling of pure radiance was transformed into horror and grief and despair in fifteen seconds. And now on October 27, like a fighter who’s taken a vicious blow to the stomach and has groggily arisen, this region moves on and moves ahead. And one part of that scenario is the resumption of the World Series. No one in this ballpark tonight- no player, no vendor, no fan, no writer, no announcer, in fact, no one in this area period- can forget the images. The column of smoke in the Marina. The severed bridge. The grotesque tangle of concrete in Oakland. The pictures are embedded in our minds; and while the mourning and the agonizing and the aftereffects continue, in about thirty minutes the plate umpire, Vic Voltaggio will say ‘Play Ball’, and the players will play, the vendors will sell, the crowd will exhort, the announcers will announce. And for many of the six million people in this region, it will be like revisiting Fantasyland. But Fantasyland is where baseball comes from anyway, and maybe, right about now, that’s the perfect place for a three-hour rest.

Al Michaels at the beginning of ABC’s telecast of the resumption of Game 3 of the 1989 World Series.

雖然係唔同事件，但係個信息有相似嘅地方，就算情況點樣差都好，都係嗰句說話：「雨過天青。」同樣，自從9/11之後，紐約市經歷過好多其他財務事故，包括2003年嘅WorldCom醜聞、由2007年次級房屋信貸危機所引起嘅2008年嘅環球股災，導致雷曼兄弟爆煲，以及其他財務集團受到財困，甚至好多銀行因此而破產，更加唔使講「習氏肺炎」嘅襲擊而令到好多公司嘅職員選擇居家工作，就連興建9/11紀念廣場同埋新世貿大廈都搞到滿城風雨，但經過多年嘅清場、重建、爭議及辯論，最終喺2014年完成，大量受害人家屬及旅客都慕名而來參觀，如果我儲夠假期同埋預咗好嘅時間嘅話，我真係好想去觀看一次，因為我嚟咗美國三十三年都從未踏足紐約市，不過嗰度啲物價指數或者會嚇死人，除非有個女仔或者導遊帶我去啦。